ACS Technology

News

മൂത്രാശയ അണുബാധ തടയാൻ ധാരാളം വെള്ളം കുടിച്ചാൽ മാത്രം പോര; ഇക്കാര്യങ്ങൾ ശ്രദ്ധിക്കാം 

Lifestyle

മൂത്രാശയ അണുബാധകൾ വളരെക്കൂടുതലായി കാണുന്നത് സ്ത്രീകളിലാണ്. സ്ത്രീകളിലുണ്ടാകുന്ന മൂത്രാശയ അണുബാധകളുടെ മുഖ്യകാരണങ്ങളിലൊന്ന് ഇ കോളി എന്ന ബാക്ടീരിയയാണ്. മലാശയത്തിൽ ഈ രോഗാണു ഉണ്ടാകാനുള്ള സാധ്യത കൂടുതലാണ്. സ്ത്രീകളിൽ പലരും അധികനേരം മൂത്രം പിടിച്ചുനിർത്തുന്ന ശീലമുള്ളവരാണ്. കൂടുതൽ നേരം മൂത്രം പിടിച്ച് നിർത്തുന്നത് അണുബാധയ്ക്കുള്ള സാധ്യത കൂട്ടുന്നു. മഴക്കാലത്താണ് അണുബാധ കൂടാനുള്ള സാധ്യത കൂടുതൽ.

ഇടയ്ക്കിടെ മൂത്രമൊഴിക്കൽ, വേദന, അടിവയറ്റിലെ അസ്വസ്ഥത, ക്ഷീണം, ഛർദ്ദി, പനി എന്നിവ മൂത്രാശയ  അണുബാധയുടെ ലക്ഷണങ്ങളാണ്. വെള്ളം കുടിക്കുന്നതിന്റെ അളവ് കുറയുന്നതാണ് ഇതിന് പ്രധാന കാരണമെന്ന് പൊതുവിൽ പറയുമെങ്കിലും മറ്റ് കാരണങ്ങളാലും ഈ അസുഖം വരാം.

കൂടുതൽ സമയം പുറത്ത് ചിലവഴിക്കേണ്ടിവരുന്നവർക്ക് വേനൽക്കാലത്ത് നിർജ്ജലീകരണം ഉണ്ടാകുന്നത് അണുബാധയിലേയ്ക്ക് നയിക്കാം. ലൈംഗിക ബന്ധത്തിലേർപ്പെടുന്നതും സ്ത്രീകളിൽ മൂത്രനാളിയിലെ അണുബാധ ഉണ്ടാകുന്നതിന് മറ്റൊരു കാരണമാണ്. ആന്റിബയോട്ടിക്കുകൾ കൂടുതൽ കഴിക്കുന്നവരിലും അണുബാധയ്ക്കുള്ള സാദ്ധ്യത കൂടുതലാണ്.

എങ്ങനെ തടയാം

1.ധാരാളം വെള്ളം കുടിക്കുക: അണുബാധയ്ക്ക് കാരണമാകുന്ന ബാക്ടീരിയകളെ ശരീരത്തിൽ നിന്ന് പുറന്തള്ളാൻ ധാരാളം വെളളം കുടിക്കുന്നതിലൂടെ സാധിക്കുന്നു.

2. ശുചിത്വ ശീലം: നല്ല ശുചിത്വ ശീലം പാലിക്കുന്നത് അണുബാധയെ തടയാൻ സഹായിക്കും.

3. ദീർഘനേരം മൂത്രം പിടിച്ചുനിർത്തരുത്: വെള്ളം കുടിക്കുമ്പോൾ അതിനനുസരിച്ച് മൂത്രമൊഴിക്കുകയും വേണം. അല്ലെങ്കിൽ ശരീരത്തിൽ ബാക്ടീരിയകളുടെ വളർച്ച കൂട്ടാൻ ഇത് കാരണമാകും. ശരീരത്തിൽ എത്രസമയം മൂത്രം പിടിച്ചുവയ്ക്കുന്നുവോ അത്രയധികം അണുബാധ ഉണ്ടാകാനുള്ള സാദ്ധ്യതയും കൂടുതലാണ്.

4. ലൈംഗിക ബന്ധത്തിന് ശേഷം മൂത്രമൊഴിക്കുക: ലൈംഗിക ബന്ധത്തിൽ ഏർപ്പെടുമ്പോൾ ഉണ്ടാവുന്ന ഘർഷണവും സ്രവങ്ങളും കാരണം, മൂത്രനാളിയുടെ ഉപരിതലത്തിൽ കാണപ്പെടുന്ന സൂക്ഷ്മാണുക്കൾ മൂത്രനാളിയിലേക്ക് പ്രവേശിക്കാനുള്ള സാദ്ധ്യതയുണ്ട്, അതിനാൽ ലൈംഗിക ബന്ധത്തിന് ശേഷം മൂത്രമൊഴിച്ച് സൂക്ഷ്മാണുക്കളെ പുറന്തള്ളേണ്ടത് പ്രധാനമാണ്.

5. ക്രാൻബെറി ജ്യൂസ്: ക്രാൻബെറി ജ്യൂസ് കുടിക്കുന്നത് മൂത്രനാളിയിലെ അണുബാധ തടയാൻ സഹായിക്കുന്നു. ക്രാൻബെറിയിൽ മൂത്രനാളിയിലേക്ക് ബാക്ടീരിയയെ എത്തുന്നത് തടയാൻ സഹായിക്കുന്ന പദാർത്ഥങ്ങളുണ്ട്, അതിനാൽ അണുബാധ തടയാൻ ഇത് സഹായിക്കുന്നു.

English Summary : tips to prevent urinary tract infection



Related News

Other News


Trending

View all

LATEST STORIES FROM Kerala Voter